Tadqiqot natijalariga ko‘ra, 2024-yilda O‘zbekistonda noqonuniy tamaki bozorining hajmi umumiy aylanmaning o‘rtacha 12,4 foizini tashkil etgan. Ammo hududlar bo‘yicha vaziyat sezilarli darajada farqlanadi.

Kontrafakt mahsulotlarning eng yuqori darajasi Namangan viloyatida qayd etilgan bo‘lib, bu yerda noqonuniy mahsulotlarning ulushi 38,8 foizga yetgan. Bu ko‘rsatkich mamlakat bo‘yicha o‘rtacha ko‘rsatkichdan uch barobar yuqori. Farg‘ona viloyati (24,7%) va Jizzax viloyati (18,2%) ham yuqori xavf zonasida joylashgan.

Boshqa hududlarda vaziyat nisbatan yaxshiroq. Xususan, Navoiy (12,8%), Andijon (11,2%) va Qashqadaryo (9,7%) viloyatlarida pastroq ko‘rsatkichlar kuzatilgan. Noqonuniy aylanmaning eng past darajasi esa Toshkent shahri (9,5%) va Toshkent viloyatida (7,6%) qayd etilgan.

Tamaki mahsulotlari kontrabandasi katta iqtisodiy zarar yetkazib, davlat byudjetiga 500 milliard so‘mlik yo‘qotishga olib kelmoqda.