Sanoat, radiatsiya va yadro xavfsizligi qo‘mitasi tegishli ruxsatnomasiz rentgen uskunalaridan foydalanish holatlarini aniqlamoqda. Qo‘mita bo‘lim boshlig‘i Bahodir Fayzullayevning aytishicha, vaziyat o‘rganilganda, mamlakatda 2500 ga yaqin rentgen apparati o‘rnatilgani, ammo ularning bir qismi zarur hujjatlarni rasmiylashtirilmagan holda ishlayotgani ma’lum bo‘ldi.

Rentgen asbob-uskunalari tibbiyotda tashxis qo‘yish uchun keng qo‘llanilsa-da, u ionlashtiruvchi nurlanish tarqatadi. Radiatsiyaviy xavfsizlik qoidalariga rioya etilishi ustidan nazoratning yo‘qligi bemorlar va tibbiyot xodimlari uchun salbiy oqibatlarga olib kelishi mumkin. Radiatsiyaning uzoq muddatli ta’siri onkologik kasalliklar xavfini oshiradi, shuningdek, organizmda qaytarib bo‘lmas o‘zgarishlarni keltirib chiqarishi mumkin. So‘nggi besh yilda dunyoda onkologik holatlar soni 25 foizga ko‘paydi.

O‘zbekiston qonunchiligiga ko‘ra, rentgen uskunalaridan foydalanish uchun maxsus ruxsatnoma talab etiladi. Ushbu qoidani buzish bazaviy hisoblash miqdorining 150 baravari miqdorida jarima solishga olib keladi.