Toshkentda Shveysariya hukumati ko‘magida amalga oshirilayotgan “Zarafshon daryosi havzasi suv resurslarini iqlimga chidamli integratsiyalashgan boshqarish” loyihasining rasmiy ishga tushirilishi bo‘lib o‘tdi. Tashabbus O‘zbekistonning beshta hududida suvdan foydalanishni takomillashtirish va iqlim o‘zgarishiga moslashishga qaratilgan.

Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov loyihaning ahamiyatini ta’kidlab, uning «Atrof-muhitni muhofaza qilish va yashil iqtisodiyot yili‘dagi alohida o‘rnini ko‘rsatib o‘tdi. U yangi texnologiyalarni joriy etish va mahalliy aholining ko‘nikmalarini rivojlantirish suv ta’minoti tizimining uzoq muddatli barqarorligini ta’minlashga yordam berishini qayd etdi.

Loyiha 2027-yilgacha Samarqand, Jizzax, Navoiy, Buxoro va Qashqadaryo viloyatlarida amalga oshiriladi. U 50 dan ortiq iqlim stansiyalarini o‘rnatish, yer osti suvlarini kuzatish uchun quduqlarni avtomatlashtirish, fermerlarni suv resurslaridan samarali foydalanishga o‘rgatish va “Yashil maktab” tushunchasini joriy etishni nazarda tutadi.

Shveysariyaning O‘zbekistondagi elchisi Konstantin Obolenskiy loyiha Shveysariyaning gidrologiya sohasidagi tajribasiga va zamonaviy ma’lumot to‘plash texnologiyalariga asoslanishini ta’kidladi. Bu esa sug‘orishni rejalashtirish va suv resurslarini boshqarishni yaxshilashga imkon beradi. Tashabbusda MeteoSwiss va Hydrosolutions GmbH ham ishtirok etib, iqlim barqarorligi sohasidagi xalqaro hamkorlikka hissa qo‘shmoqda.