O‘zbekistonda tashabbusli byudjet doirasida har bir tuman yoki shahar uchun loyihalarni moliyalashtirishning minimal va maksimal chegarasi belgilandi. Endilikda tuman va shahar budjetlaridan har yili kamida 10 ta va ko‘pi bilan 30 ta tashabbusni amalga oshirish uchun mablag‘ ajratiladi. Moliyalashtirish hajmi aholi soniga qarab belgilanadi: aholi zich joylashgan hududlar ko‘proq mablag‘ olish imkoniyatiga ega bo‘ladi.

Hozirgi kunda bitta loyihaning eng yuqori qiymati 1,5 milliard so‘mni tashkil etadi. Shunga ko‘ra, ajratiladigan mablag‘larning eng kam miqdori 15 milliard so‘m, eng ko‘pi esa 45 milliard so‘mni tashkil etadi.

Yangi qoidalar tashabbusli byudjet mablag‘laridan transport vositalari, jamoat xavfsizligi uchun uskunalar (radarlar, videokuzatuv kameralari, svetoforlar) va rahbarlar uchun mebel sotib olishni taqiqlaydi.

Bundan tashqari, moliyaviy mustaqil oliy ta’lim muassasalari endi tashabbuskorlik jarayonida qatnashmaydi. Ta’lim, sog‘liqni saqlash vazirliklari va boshqa asosiy idoralar tashabbusli byudjet doirasida xarid qilish uchun ruxsat etilgan asbob-uskunalarning yangilangan ro‘yxatini taqdim etishlari lozim.

Qonunbuzarliklarning oldini olish maqsadida Bandlik va kambag‘allikni qisqartirish vazirligi Iqtisodiyot va moliya vazirligi bilan hamkorlikda byudjet tashkilotlari xodimlarini ovoz berishda ishtirok etishga majburlashni bartaraf etish choralarini ko‘radi. Ish natijalari muntazam ravishda Senatga taqdim etib boriladi.