O‘zbekistonda tibbiy xizmatlar sifatini yaxshilash va yuqori texnologik davolash usullarini ommalashtirish maqsadida tibbiyot muassasalarini keng ko‘lamda yangilash ishlari davom etmoqda. Bu maqsadlar uchun har yili davlat byudjetidan kamida 100 milliard so‘m mablag‘ ajratiladi. 2023-yilda qo‘shimcha ravishda 200 million dollar xorijiy investitsiya va 94 million dollar grant jalb qilinib, shifoxonalar zamonaviy uskunalar bilan jihozlandi.
Bu chora-tadbirlar tufayli ilgari faqat respublika klinikalarida mavjud bo‘lgan tomograflar, angiograflar va boshqa murakkab uskunalar viloyat va tuman shifoxonalariga o‘rnatildi. Bu esa, hatto chekka hududlarda ham aholi uchun ixtisoslashgan tibbiy xizmatlarning yanada qulayroq bo‘lishini ta’minladi.
2024-yilda byudjetdan ajratilgan mablag‘ 200 milliard so‘mga ko‘paytirildi, sog‘liqni saqlash sohasiga kiritilayotgan investitsiyalarning umumiy hajmi esa 370 million dollarga yetadi. Ushbu mablag‘lar hisobidan bir qator yirik loyihalarni amalga oshirish rejalashtirilgan. Jumladan, Osiyo taraqqiyot bankining 100 million dollar mablag‘i evaziga 230 ta tug‘ruqxona uchun 21 mingdan ortiq tibbiy uskuna va 6 ta reanimobil xarid qilinadi.
Bundan tashqari, Germaniyaning KfW banki Qoraqalpog‘iston va Xorazmda yurak-qon tomir kasalliklarini davolash uchun uskunalar xarid qilishga 30 million yevro ajratadi. Shu bankning 13,5 million yevro miqdoridagi granti hisobiga Termiz shahrida zamonaviy simulyatsion uskunalar bilan jihozlangan yotoqxonali o‘quv markazi barpo etiladi.
Biroq texnikani yangilash umumiy vazifaning bir qismi, xolos. Prezidentimiz uskunalardan samarali foydalanish uchun malakali kadrlar tayyorlash zarurligini ta’kidladi. Shu bois shifokorlar va hamshiralarni o‘qitish, autsorsing va davlat-xususiy sheriklik loyihalarini joriy etish bo‘yicha ko‘rsatmalar berildi.
Mavjud resurslardan samarali foydalanish ham asosiy mavzuga aylandi. Viloyatlarda angiograflarning o‘rtacha yuklamasi atigi 34 foizni tashkil etib, tomograflardan foydalanish darajasi hududlar o‘rtasida keskin farq qilishi qayd etildi. Texnikadan samarali foydalanishni ta’minlash uchun mahalliy hokimiyat organlari bilan hamkorlikda yangi yondashuvlar ishlab chiqiladi.