O‘zbekistonda sotuvchilarga tovarlarni o‘z vaqtida yetkazib bermaganlik uchun jarima to‘lash majburiyatini yuklash bo‘yicha yangilik muhokama qilinmoqda. Oliy Majlis Qonunchilik palatasi 21 yanvar kuni «Iste’molchilar huquqlarini himoya qilish to‘g‘risida‘gi qonunga tegishli o‘zgartishlarni birinchi o‘qishda ma’qulladi.

Qonun loyihasiga ko‘ra, belgilangan muddatda majburiyatlarni bajarmagan sotuvchilar kechiktirilgan har bir kun, soat yoki daqiqa uchun tovar qiymatining 0,5 foizi miqdorida jarima to‘lashga majbur bo‘ladi. Kompensatsiyaning eng yuqori miqdori tovar narxining 100 foizigacha yetishi mumkin.

Qonun tashabbuskorlari ta’kidlashicha, jarimani to‘lash sotuvchilarni tovarni kechiktirib yetkazish yoki to‘liq yetkazib bermaslik oqibatida yetkazilgan zararni qoplash majburiyatidan ozod qilmaydi. Biroq, kechikish iste’molchining aybi bilan sodir bo‘lgan taqdirda, sotuvchi javobgarlikdan ozod etiladi.

Raqobatni rivojlantirish va iste’molchilar huquqlarini himoya qilish qo‘mitasi raisining o‘rinbosari Farrux Qoraboyev ma’lum qilishicha, 2024-yilda fuqarolardan 30 mingdan ortiq murojaat kelib tushgan bo‘lib, ularning 35 foizi savdoga taalluqli. Ular orasida maishiy texnika, mebel va tayyor ovqatlar kabi tovarlarni yetkazib berish kechikishi bo‘yicha 4000 dan ortiq shikoyat mavjud. Raqamli platformalar orqali xarid qilishdagi muammolar 1500 ta murojaatda qayd etilgan.

Yig‘ilishda yangi qoidani elektr energiyasi, suv va gaz yetkazib beruvchilarga ham tatbiq etish taklifi bildirildi. Deputat Dilnoza Azizova ushbu sohalardagi uzilishlarni eslatib, bunday holatlarda iste’molchilar huquqlarini himoya qilish masalasiga e’tibor qaratdi.

Bunga javoban qonun tashabbuskorlari asosli takliflar hujjatni takomillashtirish jarayonida inobatga olinishini ta’kidladilar, biroq tafsilotlar hozircha oshkor qilinmagan.

Qonun loyihasi 131 deputat tomonidan qo‘llab-quvvatlandi, 4 nafari betaraf qoldi, birorta ham qarshi ovoz berilmadi. Hujjat takomillashtirilishi va ikkinchi o‘qishda taqdim etilishi kutilmoqda.