2025-yil 1-maydan O‘zbekistonda aholi, ayniqsa, yoshlar uchun sanitariya-gigiyena sharoitlarini yaxshilashga qaratilgan “Toza qo‘llar” dasturi amalga oshiriladi. Loyihaning tashabbuskori Sanitariya-epidemiologik osoyishtalik va jamoat salomatligi qo‘mitasi bo‘ldi. Ushbu tashabbus O‘zbekiston Respublikasi Prezidentining “O‘zbekiston-2030” strategiyasini “Atrof-muhitni muhofaza qilish va “yashil” iqtisodiyot yili‘da amalga oshirishga oid davlat dasturi to‘g‘risida‘gi Farmoni loyihasiga kiritilgan.

Dastur mamlakatda sanitariya-gigiyena holatini yaxshilash bo‘yicha keng qamrovli chora-tadbirlarni o‘z ichiga oladi. Sog‘liqni saqlash va ta’lim muassasalari zarur gigiyenik vositalar bilan ta’minlanadi. Shuningdek, sanitariya xonalarining texnik holatini modernizatsiya qilish, jumladan, yangi obyektlarda bunday xonalarni binolar ichida majburiy ravishda joylashtirish rejalashtirilmoqda. Bundan tashqari, umumiy ovqatlanish korxonalari va boshqa jamoat muassasalari sifatli sanitariya-gigiyena vositalaridan foydalanish imkoniyatiga ega bo‘ladi.

2025-yil 1-avgustgacha Jahon sog‘liqni saqlash tashkiloti va BMT xalqaro ekspertlari ishtirokida tayyorlangan “2025-2028-yillarda O‘zbekistonda sanitariya-gigiyena tizimini takomillashtirish” dasturi Vazirlar Mahkamasiga taqdim etiladi.

Dasturning amalga oshirilishi nafaqat sanitariya sharoitlari darajasini oshirish, balki aholi salomatligini mustahkamlash, mamlakatda sanitariya-epidemiologik vaziyatni yaxshilash va “yashil” iqtisodiyot standartlarini qo‘llab-quvvatlash imkonini beradi.