O‘zbekiston Prezidenti mamlakatning transport-logistika tizimini yanada rivojlantirish to‘g‘risidagi qarorni tasdiqladi. Hujjatga ko‘ra, 2030 yilgacha rivojlanish konsepsiyasi qabul qilindi va uni amalga oshirish uchun “yo‘l xaritasi” ishlab chiqildi.

Dasturning asosiy maqsadlari barcha turdagi transportda xalqaro yuk tashishni ikki barobar ko‘paytirish, transport va logistika xizmatlari eksportini ikki barobarga oshirish, shuningdek, konteyner tashish hajmini 50 foizga ko‘paytirish. Bundan tashqari, O‘zbekistonning Jahon bankining Logistika samaradorligi indeksidagi (LPI) o‘rnini yaxshilash rejalashtirilgan — mamlakat 55 ta yetakchi davlat qatoriga kirmoqchi.

2025 yil 1 iyundan boshlab Davlat chegarasidagi nazorat-o‘tkazish punktlarida avtotransport vositalari uchun elektron navbat tizimi joriy etiladi. Bu kutish vaqtini qisqartiradi va xalqaro tashishlar samaradorligini oshiradi. Shuningdek, xalqaro tashuvlarni tashkil etishda transport-ekspeditorlik xizmatlariga QQS nol stavkada qo‘llaniladi.

Xalqaro avtomobil transporti ittifoqi bilan hamkorlikda xalqaro avtomobil tashuvlari sohasida mutaxassislarni tayyorlash va malakasini oshirish uchun Mintaqaviy o‘quv markazi tashkil etiladi. Umumiy foydalanishdagi avtomobil yo‘llari bo‘ylab esa zamonaviy xizmat ko‘rsatish hududlari barpo etilib, haydovchilar va yo‘lovchilar uchun qulay sharoitlar yaratiladi.