Prezident Shavkat Mirziyoyev taqiqlangan yovvoyi hayvonlarni saqlash uchun javobgarlikni belgilaydigan qonunni imzoladi. Hujjat Ma’muriy javobgarlik to‘g‘risidagi kodeksga o‘zgartirishlar kiritib, yangi jazo choralarini joriy etmoqda.

Bunga ko‘ra, jismoniy shaxslarning yovvoyi hayvonlarni tutqunlikda, yarim erkin sharoitlarda yoki sun’iy yaratilgan yashash joylarida saqlashi hayvonlarni musodara qilish va bazaviy hisoblash miqdorining 5 baravaridan 10 baravarigacha jarima solishga sabab bo‘ladi. Bu 1 million 875 ming so‘mdan 3 million 750 ming so‘mgacha tashkil etadi.

Agar qoidabuzarlik insonlar sog‘lig‘iga yoki mol-mulkiga zarar yetkazsa, jarima bazaviy hisoblash miqdorining 30-50 baravarigacha (11 million 250 ming so‘mdan 18 million 750 ming so‘mgacha) oshiriladi, bunda hayvonlar ham musodara qilinadi.

Ilgari qonunchilikda bunday norma mavjud emas edi. Qonun rasmiy e’lon qilingan kundan boshlab kuchga kiradi.