2024-yilda O‘zbekiston aviakompaniyalari mijozlarga qoniqarsiz xizmat ko‘rsatgani uchun 220 million so‘m tovon to‘lagan. Raqobatni rivojlantirish va iste’molchilar huquqlarini himoya qilish qo‘mitasi ma’lumotlariga ko‘ra, bir yil davomida yo‘lovchilardan 240 ga yaqin shikoyat tushgan.

Aksariyat hollarda mijozlar reyslarning uzoq vaqt kechikishi sababli murojaat qilishgan. Bu vaqtda ularga dam olish xonalari, ichimlik suvi va ovqat taqdim etilmagan. Ayrim yo‘lovchilar kutish sababli chiptalardan voz kechishni ma’qul ko‘rganlar va tekshiruvlar natijasida ularga to‘liq yo‘l haqi qaytarilgan.

Tekshiruvlar natijasida aviakompaniyalar jabrlangan mijozlar foydasiga qayta hisob-kitob o‘tkazdi. Qo‘mita fikricha, bu iste’molchilar huquqlarini himoya qilish va mamlakatda havo transporti sifatini oshirishda muhim qadam bo‘ldi.