O‘zbekiston aholisining ijtimoiy himoyaga muhtoj qatlamlari bolalari Malayziyaning yetakchi universitetlaridan biri – Al-Buxoriy xalqaro universitetida bepul ta’lim olishlari mumkin bo‘ladi. Tegishli kelishuvga O‘zbekiston musulmonlari idorasi huzuridagi “Vaqf” xayriya jamg‘armasi va universitet rahbariyati o‘rtasidagi onlayn muzokaralar chog‘ida erishildi.

Yig‘ilishda O‘zbekiston Respublikasi Oliy ta’lim, fan va innovatsiyalar vazirligi vakillari ham ishtirok etdi. Tomonlar oliy ma’lumot olish uchun moliyaviy imkoniyati bo‘lmagan iqtidorli yoshlar tanlov asosida o‘qishga kirishlari va grantlar yordamida Malayziyaning mazkur universitetiga o‘qishlari mumkinligi haqida kelishib oldilar.

Al Buxoriy xalqaro universiteti xalqaro standartlarga javob beradigan va zamonaviy infratuzilmaga ega dunyoviy ta’limni taklif etadi: katta kampus, talabalar turar joyi, sport majmuasi va ilmiy markazlar. Ta'lim dasturlari Malayziya Oliy ta'lim vazirligi tomonidan tasdiqlangan.

Tomonlar, shuningdek, bo‘lajak talabalarni tanlab olish va ularning malakasini oshirishni tashkil etishni nazarda tutuvchi hamkorlik memorandumini imzolash bo‘yicha kelishuvga erishdi.

“Vaqf” xayriya jamg‘armasi tez orada yangi o‘quv yilida oliy o‘quv yurtiga o‘qishga kirish istagini bildirgan kam ta’minlangan oilalar farzandlaridan hujjatlarni qabul qilishni boshlaydi. Dastlabki tanlovdan o‘tgan nomzodlar universitetning qabul komissiyasi vakillari bilan suhbatga taklif qilinadi. Muvaffaqiyatli abituriyentlar bepul o‘qish imkoniyatiga ega bo‘ladilar.

Al-Buxoriy xalqaro universiteti 2010-yilda tashkil etilgan bo‘lib, xuddi shu nomdagi xayriya jamg‘armasi mablag‘lari hisobidan faoliyat yuritadi. U Alor Setar shahrida (Kedah shtati) joylashgan bo'lib, hozirda 60 dan ortiq mamlakatlardan 1472 talaba tahsil oladi.

Muassasa xalqaro munosabatlar, iqtisod, islom moliyasi, ta’lim va biznes boshqaruvi kabi sohalarda bakalavriat, magistratura va doktorantura dasturlarini taklif etadi.