Futzal bo‘yicha O‘zbekiston ayollar terma jamoasi bugun, 11-may kuni Osiyo Kubogi guruh bosqichining hal qiluvchi o‘yinini o‘tkazadi.“A” guruhi 3-turida O‘zbekiston terma jamoasi musobaqa mezboni Xitoy terma jamoasiga qarshi maydonga tushadi. Xohxotdagi o‘yinda jamoa medallar va jahon chempionati yo‘llanmasi uchun kurashni davom ettira oladimi yoki yo‘qligini aniqlab beradi.

Xitoy terma jamoasi dastlabki ikki uchrashuvda g‘alaba qozonib, chorak final yo‘llanmasini qo‘lga kiritdi. O‘zbekiston terma jamoasi uchun vaziyat murakkabroq: keyingi bosqichga chiqish kafolatlanishi uchun bugungi o‘yinda kamida bitta ochko olishi kerak. Reglamentga ko‘ra, har bir guruhdan ikkita eng yaxshi jamoa, shuningdek, uchinchi o‘rinni egallagan va eng yaxshi natija ko‘rsatgan ikki jamoa pley-off bosqichiga yo‘l oladi.

Eslatib o'tamiz, bu galgi turnirni O'zbekiston terma jamoasi Xitoy Taypeyi terma jamoasiga qarshi kechgan va 1:6 hisobida mag'lubiyat bilan boshlagan edi. Ammo ikkinchi davrada o‘zini to‘liq to‘plashga muvaffaq bo‘lgan o‘zbekistonlik futzalchilar Avstraliya terma jamoasi ustidan 3:1 hisobida g‘alaba qozonib, guruhdan chiqish imkoniyatlarini saqlab qolishdi.

Futzal bo'yicha ayollar o'rtasidagi Osiyo kubogi 17 mayga qadar davom etadi. Musobaqa yakuniga ko'ra kuchli uchlikka ega bo'lgan terma jamoalar joriy yilning noyabr oyida Filippinda bo'lib o'tadigan FIFA ayollar o'rtasidagi jahon chempionatiga tarixiy yo'llanmani qo'lga kiritadilar. Shu tariqa, O‘zbekiston terma jamoasi uchun nafaqat qit’a chempionatining chorak finaliga chiqish, balki jahon forumida ishtirok etish imkoniyati ham xavf ostida.