Toshkent va Kuala-Lumpur tovar ayirboshlashni sezilarli darajada oshirish va keng ko‘lamli yo‘nalishlarda o‘zaro manfaatli hamkorlikni rivojlantirish bo‘yicha kelishib oldilar. Muzokaralarda tomonlar geografik uzoqlikka qaramay, sheriklikni chuqurlashtirish muhimligini ta’kidladilar.

O‘zbekiston Malayziya kompaniyalarini telekommunikatsiya, energetika va bank sektorlaridagi davlat aktivlarini xususiylashtirishga jalb qilishdan manfaatdor. O‘zbekiston Prezidenti, shuningdek, kuzda O‘zbekistonda navbatdagi biznes-forumni o‘tkazishni taklif etdi.

Elektronika, yarim o‘tkazgichlar sanoati, sun’iy intellekt va raqamli texnologiyalar sohasidagi hamkorlikni kengaytirishga, jumladan, ma’lumotlar markazlarini yaratishga alohida e’tibor qaratildi. Gaz kimyosi va kimyo sohalarida, xususan, polimerlar, “yashil” vodorod va ammiak ishlab chiqarish bo‘yicha loyihalar istiqbolli deb topildi.

Malayziya kompaniyalari zamonaviy klinikalar qurish va innovatsion farmatsevtika preparatlarini ishlab chiqarishda, shuningdek, “aqlli” qishloq xo‘jaligi texnologiyalarini joriy etish va organik mahsulotlar ishlab chiqarishda ishtirok etishga taklif etildi. Geologiya, ta’lim, transport va ziyorat turizmida hamkorlik qilish imkoniyatlari qayd etildi.

Muzokaralarda ikki mamlakatning 200 dan ortiq yetakchi kompaniyalari, investitsiya va bank-moliya institutlari rahbarlari hamda vakillari, jumladan, Malayziyaning Petronas, MMC Corporation va DRB-Hicom kabi yirik kompaniyalari ishtirok etdi. O‘tgan yili Hukumatlararo komissiya va Ishbilarmonlar kengashi tashkil etilganining ahamiyati ta’kidlandi. Tomonlar imtiyozli savdo to‘g‘risidagi bitimni ishlab chiqmoqda, o‘zaro ko‘rgazma va yarmarkalar o‘tkazishni rejalashtirmoqda. Qo‘shma loyihalar portfeli shakllantirildi va Sanoat kooperatsiyasi dasturi ishlab chiqildi.