Qatarda O‘zbekiston Vazirlar Mahkamasi huzuridagi Migratsiya agentligi direktori Behzod Musayev, Tashqi ishlar vaziri o‘rinbosari Olimjon Abdullayev va Hamad Medical Corporation (HMC) davlat kompaniyasi rahbari Muhammad bin Xalifa Al-Suvaydiy o‘rtasida uchrashuv bo‘lib o‘tdi. Muzokaralarda O‘zbekistonning Qatardagi elchisi Ashraf Xo‘jayev ham ishtirok etdi.

O‘zbekiston tomoni Migratsiya agentligi faoliyati, tashqi mehnat migratsiyasi mexanizmlari va xalqaro hamkorlar bilan hamkorlikning muvaffaqiyatli misollar haqida ma’lumot taqdim etdi.

Hamad Medical Corporation turli yo‘nalishdagi 15 ta shifoxonani o‘z ichiga oladi, ularda 35 mingdan ortiq xodim, shu jumladan 12 ming hamshira ishlaydi. Tibbiyot muassasalari har yili Qatar va mintaqaning boshqa davlatlaridan kelgan 3 milliondan ortiq bemorga xizmat ko‘rsatadi.

Muzokaralar davomida tomonlar o‘zbek tibbiyot kadrlarini jalb qilish bilan bog‘liq masalalarni hal qilish uchun qo‘shma ishchi guruh tuzishga kelishib oldilar. Ushbu guruh ularning kasbiy va til tayyorgarligi, ish vizalarini rasmiylashtirish, Dohaga ko‘chib o‘tishini tashkil etish, shuningdek, HMC shifoxonalarida munosib ish va yashash sharoitlarini ta’minlash bilan shug‘ullanadi.