Joriy yilning 22-23 may kunlari Istanbul shahrida Turkiya Oila va ijtimoiy ishlar vazirligi tomonidan Prezident Rajab Toyyib Erdo‘g‘on tomonidan “Mustahkam oila yili” deb e’lon qilingan 2025 yil doirasida “Oila institutini mustahkamlash” xalqaro forumi bo‘lib o‘tdi.

Forumning yopilish marosimida Turkiya Respublikasi Prezidenti Rajab Toyyib Erdo‘g‘on va birinchi xonim Emine Erdo‘g‘on ishtirok etdi.

Ular o‘zlarining yakuniy so‘zlarida jamiyat va davlatchilik asosi sifatida oilaning hal qiluvchi o‘rni borligini alohida ta’kidlab, bu boradagi xalqaro hamkorlikni qo‘llab-quvvatlashlarini bildirdilar. Forum ishtirokchilari oila institutini mustahkamlovchi ilg‘or xalqaro tajribani amaliyotga tatbiq etishga qaratilgan qo‘shma strategiya va tavsiyalar ishlab chiqish zarurligini muhokama qildi.

Qirg‘iziston oilaviy qadriyatlarni saqlash va rivojlantirishga qaratilgan tashabbuslarni qo‘llab-quvvatlash orqali xalqaro hamjamiyat bilan birdamligini bildirdi.

Forumda Qirg‘iziston Respublikasi Mehnat, ijtimoiy himoya va migratsiya vaziri Ravshanbek Sabirov ishtirok etdi.

U o‘z nutqida oila bilan bog‘liq ijtimoiy siyosat masalalari bo‘yicha Qirg‘izistonning pozitsiyasini bayon qildi va mamlakatlar o‘rtasida tajriba almashish muhimligini qayd etdi.

"Qirgʻiziston oila institutini mustahkamlashga qaratilgan tashabbuslarni izchil qoʻllab-quvvatlab keladi. Anʼanaviy oilaviy qadriyatlarni saqlash barqaror va sogʻlom jamiyat poydevori, deb hisoblaymiz. Bunda nafaqat muvaffaqiyatli tajriba almashish, balki zamonaviy muammolarni hal qilish boʻyicha yondashuvlarni birgalikda ishlab chiqish ham muhim", — dedi Sobirov.

Shuningdek, u oila, gender va bolalar huquqlari masalalari bo‘yicha o‘z pozitsiyalarini bildirib, Qirg‘iziston ko‘plab xalqaro majburiyatlarga qo‘shilgani va bir qator tegishli shartnomalarni ratifikatsiya qilganini ta’kidladi.

Forumda 26 davlatdan tegishli idoralar vakillari va vazirlar ishtirok etdi. Tadbir yakunida oilani muhofaza qilish va an’anaviy qadriyatlarni targ‘ib qilish sohasida xalqaro hamkorlikni kengaytirishga qaratilgan asosiy deklaratsiyalar imzolandi.