Qirgʻiziston Respublikasi Suv xoʻjaligi, qishloq xoʻjaligi va qayta ishlash sanoati vazirligi mamlakat ichida va xorijda mehnat migratsiyasida boʻlgan fuqarolarni unumsiz yerlarni oʻzlashtirishga chaqiradi.

Vazirlik maʼlumotlariga koʻra, mamlakatimizda qishloq xoʻjaligi mahsulotlari yetishtirishda samarali foydalanish mumkin boʻlgan 614 ming gektarga yaqin unumdorligi past yerlar aniqlangan. 243-sonli qarorga muvofiq, fuqarolarga bunday hududlarni dehqonchilik qilish va shu orqali Qirg‘izistonni qishloq xo‘jaligi barqaror rivojlanadigan “yashil hudud”ga aylantirishga hissa qo‘shish imkoniyati berilgan.

Hosildorligi past yerlar va yaylovlarda dehqonchilik bilan shug‘ullanish istagida bo‘lganlar har tomonlama qo‘llab-quvvatlanadi. Xususan, tomchilatib sug‘orish tizimini o‘rnatish, imtiyozli kreditlar ajratish, shuningdek, sifatli ko‘chat va urug‘ tanlash bo‘yicha qishloq xo‘jaligi mutaxassislaridan professional maslahatlar berish ko‘zda tutilgan.

Vazirlik tuman qishloq xo‘jaligini rivojlantirish boshqarmalari bilan birgalikda qishloq xo‘jaligi yerlarini o‘zlashtirish va ulardan samarali foydalanishning barcha bosqichlarida fuqarolarni qo‘llab-quvvatlashga tayyor.