Tehronda Qirg‘iziston Respublikasi va Eron Islom Respublikasi hukumatlararo qo‘shma komissiyasi yig‘ilishi doirasida Qirg‘iziston Respublikasi Iqtisodiyot va savdo vaziri Baxit Sidiqov va Eron Milliy taraqqiyot jamg‘armasi prezidenti Mahdi G‘azanfariy muzokaralar o‘tkazdi.
Uchrashuv yakunida ikki davlat oʻrtasida qoʻshma sarmoya qoʻmitasining ijroiya asoslarini yaratishga qaratilgan anglashuv memorandumi imzolandi.
Vazir Eron-Qirg‘iziston sarmoyaviy byurosining tezroq ishga tushirilishi muhimligini ta’kidlab, uning sanoat, energetika, infratuzilma va Qirg‘iziston iqtisodiyotining boshqa muhim tarmoqlariga Eron sarmoyalarini jalb etishdagi rolini qayd etdi.
Imzolangan Memorandum Eron Milliy taraqqiyot jamg‘armasi tomonidan 50 million yevro miqdorida kredit liniyasini taqdim etishni nazarda tutadi. Mablag‘ Eron texnik va muhandislik xizmatlarini Qirg‘iziston Respublikasiga eksport qilishni qo‘llab-quvvatlashga yo‘naltiriladi.
Tomonlar erishilgan kelishuvlar ikki tomonlama iqtisodiy aloqalarni chuqurlashtirish va tovar ayirboshlash hajmini oshirish uchun asos bo‘lishiga ishonch bildirdi.