2025-yilning 7-25 aprel kunlari Qirgʻiziston Respublikasi Bolalar huquqlari boʻyicha vakil kotibiyati Qirgʻiziston kasaba uyushmalari federatsiyasi bilan birgalikda 9-11-sinf oʻquvchilarini qamrab olgan keng koʻlamli milliy taʼlim kampaniyasini oʻtkazdi. Aksiyadan ko‘zlangan maqsad o‘smirlarning huquqiy savodxonligini oshirish, mehnat ekspluatatsiyasining oldini olish va yoshlarda mehnat huquqlariga hurmat madaniyatini shakllantirishdan iborat edi.

Aksiya doirasida respublikaning to‘qqiz shahri: Bishkek, To‘qmoq, Jalolobod, Botken, Qorako‘l, Talas, O‘sh, Norin va Qora-Balta shaharlaridagi 60 ta maktabda ochiq darslar tashkil etildi. Tadbirlarda jami 5850 nafar maktab o‘quvchilari ishtirok etdi. Darslarning interfaol formati materialni samarali o'zlashtirishga yordam berdi.

Aksiya davomida mehnat qonunchiligining asosiy qoidalari: ishga qabul qilishda yosh cheklovlari, voyaga yetmaganlar uchun maqbul ish turlari, ish vaqti, shuningdek, ekspluatatsiya, majburlash va kamsitishdan himoya qilish mexanizmlarini tushuntirishga alohida e’tibor qaratildi.

Maktab o‘quvchilariga mehnat huquqlari buzilgan taqdirda qanday harakat qilish kerakligi, kasaba uyushmalari, bolalarni himoya qilish organlari va Davlat mehnat inspeksiyasi tomonidan ko‘mak olish imkoniyatlari haqida ma’lumotlar berildi.

Ta’kidlash joizki, mazkur tashabbus Bolalar huquqlari bo‘yicha vakil Kotibiyatining bolalar va yoshlarni huquqiy tarbiyalash, bolalar huquqlarini himoya qilish masalalari bo‘yicha davlat organlari va jamoat tashkilotlari bilan o‘zaro hamkorligi, shuningdek, ushbu sohadagi qonunchilikni takomillashtirish bo‘yicha takliflar ishlab chiqishga qaratilgan tizimli faoliyatining bir qismidir.