Misr poytaxtida O‘zbekiston elchixonasi diplomatlari va Misr-Afrika biznes uyushmasi (EABA) rahbariyati o‘rtasida uchrashuv bo‘lib o‘tdi. Mamlakatimiz bilan Afrika davlatlari o‘rtasida savdo-iqtisodiy aloqalarni o‘rnatish va rivojlantirish istiqbollari muzokaralarning asosiy mavzusi bo‘ldi. Muzokaralar chog‘ida tomonlar savdo-iqtisodiy hamkorlikni rivojlantirish yo‘llarini muhokama qildilar va hamkorlikning istiqbolli yo‘nalishlari, jumladan, sanoat, qishloq xo‘jaligi, farmatsevtika, to‘qimachilik, logistika sohalarini belgilab oldilar. Uchrashuv ishtirokchilari O‘zbekiston va Afrika mamlakatlari tadbirkorlari o‘rtasida to‘g‘ridan-to‘g‘ri aloqalarni mustahkamlashga kelishib oldilar. Qo‘shma korxonalar tashkil etish, eksport salohiyatini oshirish, o‘zaro sarmoyalarni jalb etishga alohida e’tibor qaratildi.

Diplomatlar O‘zbekiston nafaqat o‘z mahsulotlarini yangi bozorlarga olib chiqishdan, balki Afrika kompaniyalarining mamlakatimizda faolroq faoliyat yuritishiga imkon yaratishdan ham manfaatdor ekanini alohida ta’kidladilar.

Misr Afrika Biznes Assotsiatsiyasi (EABA) Misr va Afrika qit'asi kompaniyalari va investorlarini birlashtirgan yetakchi tashkilotdir. Assotsiatsiya mintaqa mamlakatlari oʻrtasida savdo, sanoat kooperatsiyasi va sarmoyaviy aloqalarni rivojlantirishda muhim rol oʻynaydi.

EABA hozirda qishloq xoʻjaligi va sanoatdan tortib turizm, telekommunikatsiya, sogʻliqni saqlash va energetika kabi turli sohalarni qamrab oluvchi 22 ta ixtisoslashgan qoʻmitani oʻz ichiga oladi. Assotsiatsiya Afrikaning 20 ga yaqin mamlakatida vakolatxonalariga ega bo'lib, uni ushbu bozorga kirishda muhim hamkorga aylantiradi.

Mutaxassislarning qayd etishicha, Afrika davlatlari O‘zbekiston uchun, xususan, to‘qimachilik, farmatsevtika va qishloq xo‘jaligi mahsulotlari kabi segmentlarda yangi eksport vektoriga aylanishi mumkin. EABA bilan hamkorlik barqaror ishbilarmonlik aloqalarini o'rnatish va mamlakat tashqi iqtisodiy faoliyatini diversifikatsiya qilish uchun imkoniyatlar ochadi.