Semey, 2025 yil 18 aprel – Karavan Info axborot agentligi.Suv xo‘jaligi va irrigatsiya vazirligi tashabbusi bilan butun Qozog‘iston maktablarida suvni tejash bo‘yicha ochiq darslar o‘tkazildi, unda 700 mingga yaqin bola ishtirok etdi.

Vazir Nurjan Nurjigitov ana shunday darslardan birini Semey shahrida o‘tkazib, maktab o‘quvchilariga suv resurslarini asrab-avaylash va samarali boshqarish bo‘yicha davlat tomonidan ko‘rilayotgan chora-tadbirlar, jumladan, yangi “Yo‘l xaritasi” va yaqinda imzolangan Suv kodeksi haqida so‘zlab berdi.

“Biz yoshlikdan suvdan avaylab, tejamkorlik bilan foydalanishni o‘rganishimiz kerak, maktab buning uchun ideal joy”, — deya ta’kidladi vazir va bolalar olgan bilimlarini kundalik hayotda qo‘llashni boshlashiga umid bildirdi.

“Suvni asraymiz – kelajakni asraymiz” aksiyasi doirasida suvni asrab-avaylash mavzusida respublika rasmlari tanlovi ham o‘tkazilib, respublikaning barcha hududlaridan mingdan ortiq asar jamlangan.

Foto: Qozog‘iston Respublikasi Suv xo‘jaligi va irrigatsiya vazirligi