Qozog‘iston parlamenti O‘zbekiston bilan “Markaziy Osiyo” xalqaro sanoat hamkorlik markazini tashkil etish to‘g‘risidagi kelishuvni ma’qulladi. Hujjat 2023 yil noyabr oyida Toshkentda imzolangan.

Markaz iqtisodiy va investitsiyaviy hamkorlikni rivojlantirish, yangi sarmoyalarni jalb qilish, kichik va o‘rta korxonalarning xalqaro qo‘shilgan qiymat zanjirlariga qo‘shilishiga ko‘maklashadi. Uning faoliyati ikki mamlakat o‘rtasidagi savdo-iqtisodiy aloqalarni mustahkamlashga qaratilgan.

Majmua “Atameken” va “Guliston” chegaradan o‘tish punktlari yonida joylashtiriladi. U har biri 500 kvadrat metr maydonni egallagan ikki qismdan — Qozog‘iston va O‘zbekiston hududlaridan iborat bo‘ladi. Obyektlarni boshqarishni ikki davlatning tegishli vazirliklari o‘z zimmasiga oladi.