O‘zbekiston Prezidentining maslahatchisi Saida Mirziyoyeva 2024-yilda mamlakatning Jahon savdo tashkilotiga (JST) a’zo bo‘lishi yo‘lida amalga oshirilgan ishlar yakunini sarhisob qildi.

O‘tgan yili JST Ishchi guruhining ikkita muhim yig‘ilishi o‘tkazildi. Bu a’zolikning asosiy hujjati — Ishchi guruh ma’ruzasi loyihasini shakllantirishda muhim qadam bo‘ldi. Shuningdek, AQSH, Xitoy va Yaponiya kabi 15 ta davlat bilan ikki tomonlama muzokaralar yakuniga yetkazildi, natijada 23 ta bitim imzolandi. O‘zbekistonda biznes va raqobat shaffofligini ta’minlash maqsadida qisqa muddat ichida 20 ta yangi qonun qabul qilindi.

Saida Mirziyoyeva yaqin kelajakda O‘zbekiston JSTning to‘laqonli a’zosiga aylanishi uchun ishlar avvalgi jadal sur’atda davom ettirilishini ta’kidladi. U Tashkilotga a’zo bo‘lish investitsiyalarni jalb qilish va O‘zbekiston biznesining mintaqaviy hamda global qo‘shilgan qiymat zanjirlariga qo‘shilishi uchun yangi imkoniyatlar ochishini alohida qayd etdi.

“JSTda ishtirok etish nafaqat iqtisodiy foyda, balki aholi farovonligini oshirish, munosib ish o‘rinlari yaratish va iqtisodiyotni yanada samarali boshqarishga o‘tish yo‘lidagi qadamdir,” — deya xulosa qildi Prezident maslahatchisi.