14-yanvar kuni Qonunchilik palatasi deputatlari Samarqand shahri, shuningdek, Samarqand va Oqdaryo tumanlari chegaralarini o‘zgartirish loyihasini muhokama qildilar. Bu qadam 2023-2030 yillarga mo‘ljallangan dastur doirasida zamonaviy “Shirin” ishbilarmonlik markazi va turar-joy majmuasini barpo etishga qaratilgan keng ko‘lamli loyihaning bir qismi hisoblanadi.

Vazirlar Mahkamasining taklifiga ko‘ra, Samarqand tumanidan 170 gektar, Oqdaryo tumanidan 243 gektar yer Samarqand shahriga o‘tkaziladi. Loyiha mahalla fuqarolar yig‘inlarida, shuningdek, xalq deputatlari viloyat, shahar va tuman Kengashlarining majlislarida muhokama qilinib, hududning xaritaviy tasviri va chegaralari tasdiqlandi.

Yangi hududda amalga oshiriladigan keng ko‘lamli loyiha 254 ta ko‘p qavatli uy-joy, 19 ta ishbilarmonlik va biznes markazi, 50 ta ijtimoiy obyekt va 89 ta savdo-ko‘ngilochar majmualarni o‘z ichiga oladi. Shuningdek, tarixiy shaharcha barpo etish va infratuzilmani rivojlantirish loyihalari ham ko‘zda tutilgan: 112 km ichki yo‘llar, piyodalar va velosiped yo‘laklari, 6 km yer usti metrosi, ikkita katta ko‘prik, hamda 7,2 km ichki kommunikatsiya tunneli qurilishi rejalashtirilgan.

Bundan tashqari, viloyatda salmoqli sug‘orish infratuzilmasi, jumladan, 180 km quvur va 14 km kanal barpo etish mo‘ljallanmoqda. Deputatlarning fikricha, bu o‘zgarishlar aholi turmush sharoitini sezilarli darajada yaxshilashga, ishlab chiqarish va xizmat ko‘rsatish imkoniyatlarini kengaytirishga xizmat qiladi. Qaror loyihasi birinchi o‘qishda qabul qilindi.