Oliy Majlis Senati moliyaviy barqarorlikni mustahkamlash va bank tizimiga ishonchni oshirishga qaratilgan ‘Banklardagi omonatlarni himoya qilish kafolatlari to‘g‘risida»gi qonunni ma’qulladi. Yangi qonun 200 million so‘mgacha bo‘lgan omonatlarning saqlanishini va zarur hollarda ularning tezkor ravishda qoplanishini kafolatlaydi.

Yalpi majlisda bank sohasida raqobat muhitini rivojlantirish va omonatlarni kafolatlash tizimini takomillashtirish mamlakatimizning ustuvor yo‘nalishi ekanligi ta’kidlandi. Qabul qilingan qonun xalqaro standartlar va xorijiy tajribaga mos bo‘lib, O‘zbekiston moliya sektorining uzoq muddatli barqarorligini mustahkamlashga xizmat qiladi.

Hujjat kafolatlangan omonatlar, kafolatlash obyektlari va hodisalari, shuningdek, tovon pullarini to‘lash tartibini batafsil tartibga soladi. Qonunni amalga oshirish uchun aniq huquqiy maqom, majburiyat va vakolatlarga ega bo‘lgan Omonatlarni kafolatlash agentligi mas’ul bo‘ladi.

Qonunga ko‘ra, agentlik har bir bankdagi bir mijoz uchun 200 million so‘mgacha bo‘lgan omonatni to‘liq qoplash majburiyatini oladi. Shuningdek, bank tugatilgan taqdirda to‘lovlarni amalga oshirish muddatlarini qisqartirish ko‘zda tutilgan. 2025-yil 1-yanvardan boshlab tovon pullari 20 ish kuni ichida, 2026-yildan 15 ish kuni ichida to‘lanadi, 2027-yildan esa bu muddat 7 ish kunigacha qisqartiriladi.