Senatning Byudjet va iqtisodiy masalalar qo‘mitasida “O‘zbekiston — 2030” strategiyasini amalga oshirish doirasidagi Davlat dasturi loyihasini muhokama qilishga bag‘ishlangan majlis o‘tkazildi. Dastur “Atrof-muhitni muhofaza qilish va yashil iqtisodiyot yili” deb e’lon qilingan yil doirasida ishlab chiqilgan.

Hujjat strategiyaning beshta ustuvor yo‘nalishini aks ettiruvchi 2025-yilgacha mo‘ljallangan chora-tadbirlar rejasini o‘z ichiga oladi. Shuningdek, loyihada joriy yilda tayyorlanishi lozim bo‘lgan me’yoriy-huquqiy hujjatlar hamda har bir yo‘nalish bo‘yicha belgilangan maqsadli ko‘rsatkichlar ko‘zda tutilgan.

Barqaror iqtisodiy o‘sishni ta’minlashga qaratilgan yangicha yondashuvlarga alohida e’tibor berildi. Dasturda 2030-yilgacha yalpi ichki mahsulotning yillik o‘sishini kamida 6 foizga yetkazish, kambag‘allik darajasini pasaytirish va aholi farovonligini sezilarli darajada oshirish kabi maqsadlar belgilangan.

Iqtisodiyot hajmini ikki barobar ko‘paytirish va o‘rtachadan yuqori daromadli mamlakat maqomiga erishish rejalashtirilmoqda. Buning uchun tadbirkorlar bilan hamkorlik qilishda “korxonabay” tamoyilini joriy etish, mahalliy mahsulotlar eksportini kengaytirish va xalqaro bozorlarda “O‘zbekistonda ishlab chiqarilgan” brendini mustahkamlash ko‘zda tutilgan.