Muhokama chog‘ida mamlakatimizda inshootlar xavfsizligini oshirish va shaharsozlik sohasini takomillashtirish bo‘yicha faol choralar ko‘rilayotgani ta’kidlandi. Biroq qurilish me’yorlarini buzish holatlari ko‘payib bormoqda.

So‘nggi uch yilda qariyb 23 mingta shunday holat aniqlangan bo‘lsa, 2024-yilda ularning soni to‘qqiz mingtaga yetdi. Bu esa 4 mingdan ortiq obyektda qurilishning to‘xtatilishiga va bir yarim mingtasining buzilib tashlashiga sabab bo‘ldi.

Senatorlar noqonuniy qurilishlar ko‘payib borayotganiga e’tibor qaratishdi. 2022-2024-yillar oralig‘ida 13 mingdan ortiq inshoot ro‘yxatdan o‘tkazilmasdan qurilgan, bu esa tashkiliy va huquqiy bo‘shliqlar bilan bog‘liq. Ular orasida ruxsatsiz qurilish, bosh rejalarni buzish, jarimalarning samaradorligi pastligi va loyihachilarning ko‘rsatmalarini e’tiborsiz qoldirganlik uchun javobgarlikning yo‘qligi kabi holatlar bor.

Qonun Jinoyat va Ma’muriy kodekslarga, shuningdek ruxsat berish tartib-taomillari to‘g‘risidagi qonun hujjatlariga o‘zgartishlar kiritishni nazarda tutadi. Endilikda ko‘p kvartirali uylarda binolardan foydalanish qoidalarini buzish, noqonuniy qurilish, shuningdek, yuk ko‘taruvchi konstruksiyalarni o‘zboshimchalik bilan qayta qurish uchun jinoiy javobgarlik joriy etilmoqda. Bunda qoidabuzarlikka birinchi marta yo‘l qo‘ygan va uning oqibatlarini bartaraf etgan shaxs javobgarlikdan ozod qilinishi mumkin.

Sanksiyalarni kuchaytirish va nazoratni qattiqqo‘llashtirish jiddiy oqibatlarga olib kelishi mumkin bo‘lgan qoidabuzarliklarning oldini olishga qaratilgan.