Qabul qilingan Qonun unitar korxonalar va qo‘shimcha javobgarlikka ega bo‘lgan jamiyatlarni tugatishni nazarda tutadi.

Shuningdek, mas’uliyati cheklangan jamiyatlarning ta’sis shartnomalarini majburiy davlat ro‘yxatidan o‘tkazish joriy etilmoqda hamda korporativ shartnoma, konsorsium va konsorsium shartnomasi kabi tuzilmalarning huquqiy maqomi belgilanmoqda.

Yangi qoidalarga ko‘ra, xo‘jalik jamiyatlari kuzatuv kengashlarining aksiyalar, korporativ obligatsiyalar va boshqa qimmatli qog‘ozlarni chiqarish to‘g‘risidagi qarorlari oshkora bo‘lishi va qonun hujjatlari talablariga mos kelishi lozim. Qimmatli qog‘ozlar bozorini tartibga solish bo‘yicha vakolatli organ qimmatli qog‘ozlar chiqarilishini davlat ro‘yxatidan o‘tkazish va ushbu bozorda professional faoliyatni litsenziyalash to‘g‘risidagi ma’lumotlarni e’lon qiladi.

Senatorlar ushbu Qonun xo‘jalik jamiyatlari faoliyati uchun qulay sharoitlar yaratishi, ularni boshqarishni soddalashtirishi, korporativ munosabatlarni yaxshilashi hamda ishtirokchilar va aksiyadorlarning huquqlarini himoya qilishni kuchaytirishi, o‘z ahamiyatini yo‘qotgan byurokratik tartib-qoidalar bartaraf etilishini ta’kidladilar.