27-31 yanvar kunlari Shahrisabz shahri va Miraki qishlog‘ida ayollar uchun elektron tijorat va raqamli ko‘nikmalarni rivojlantirish bo‘yicha o‘quv mashg‘uloti o‘tkazildi. Tadbir O‘zbekiston Iqtisodiyot va moliya vazirligi hamda BMTTDning “Raqamli iqtisodiyot va raqamli tadbirkorlikni rivojlantirishda yoshlarning imkoniyatlarini kengaytirish” qo‘shma loyihasi doirasida, Shveysariya taraqqiyot va hamkorlik agentligi (SDC) moliyaviy ko‘magida tashkil etildi.

O‘quv mashg‘ulotining asosiy maqsadi 100 nafar ayolga elektron tijorat asoslari, raqamli marketing, onlayn savdo, shuningdek, mehmonxona biznesida raqamli texnologiyalardan foydalanishni o‘rgatish edi. Ishtirokchilar mijozlarni jalb qilish, onlayn bron qilish tizimlari bilan ishlash, ijtimoiy tarmoqlarni yuritish va shaxsiy brend yaratish bo‘yicha amaliy bilimlar olishdi.

Dastur ikki bosqichdan iborat bo‘ldi. Birinchi bosqichda ishtirokchilar ma’ruza va amaliy mashg‘ulotlar orqali elektron tijorat asoslarini o‘rganishdi. Ikkinchi bosqich mentorlik yordamiga asoslandi: eng faol ishtirokchilarga loyihalarni amalga oshirishda ko‘maklashadigan mentorlar biriktirildi.