Prezident Shavkat Mirziyoyev raisligidagi yig‘ilishda 2024-yil uchun investitsiya sohasidagi asosiy vazifalar belgilandi. Mamlakat 42 milliard dollar miqdorida xorijiy sarmoyalarni jalb etishni maqsad qilgan.

Bu maqsadga erishish uchun xalqaro moliya institutlari bilan hamkorlikni kuchaytirish rejalashtirilmoqda. Jumladan, Yevropa tiklanish va taraqqiyot banki bilan 1,1 milliard dollarlik, Islom taraqqiyot banki bilan esa 1 milliard dollarlik yirik loyihalar kelishib olingan.

Xorijiy kompaniyalar boshqaruviga topshiriladigan yangi texnoparklar tashkil etishga alohida e’tibor qaratiladi. Bunday tajriba 2023-yilda o‘zini oqlagan bo‘lib, 12 ta texnoparkda jami 2,5 milliard dollarlik 27 ta loyiha amalga oshirilgan.

Shu bilan birga, Prezident mavjud muammolarni ham ko‘rsatib o‘tdi. Sirdaryo va Buxoro viloyatlari hamda Qoraqalpog‘iston Respublikasi kabi ayrim hududlarda investitsiyalar rentabelligi o‘rtacha darajadan past bo‘lib qolmoqda. Bundan tashqari, 92 ta yangi korxona o‘rnatilgan uskunalarni hali ishga tushirmagan, 105 ta tadbirkor esa o‘z uskunalarini bojxona omborlaridan olib chiqmagan.

Hokimlar va tarmoq rahbarlari faoliyati samaradorligini oshirish uchun Shavkat Mirziyoyev barcha bosqichlarda nazorat va mas’uliyatni kuchaytirish bo‘yicha ko‘rsatmalar berdi. Bosh vazirga investitsiya tushumlarini ta’minlash bo‘yicha choraklik reja ishlab chiqish va uning so‘zsiz bajarilishini ta’minlash vazifasi topshirildi.