Prezident Shavkat Mirziyoyev 27-yanvar kuni “Atrof-muhitni muhofaza qilish va yashil iqtisodiyot yili” Davlat dasturi loyihasiga bag‘ishlangan yig‘ilish o‘tkazdi. O‘zbekiston 2025-yilda iqtisodiyotning resurs tejamkor modeliga o‘tishda jiddiy qadam tashlashni maqsad qilgan.

So‘nggi yillarda mamlakatimizda “yashil iqtisodiyot” tamoyillari faol joriy etilmoqda. Hududlarda 16 ta yirik quyosh va shamol elektr stansiyasi, 35 ta kichik gidroelektr stansiyasi ishga tushirildi, quyosh panelli uylar soni 60 mingdan oshdi. “Yashil energiya” ulushi allaqachon 16 foizga yetdi va 2024-yilda yangi elektr stansiyalari hamda energiya saqlash quvvatlarini ishga tushirish orqali bu ko‘rsatkichni 26 foizga yetkazish ko‘zda tutilgan.

Suvdan foydalanish va ko‘kalamzorlashtirish masalalariga alohida e’tibor qaratilmoqda. “Yashil makon” dasturi doirasida har yili 200 million tup daraxt ekilmoqda. Orol dengizining qurigan tubida 2 million gektarga yaqin yashil hududlar barpo etildi. Joriy yilda 18 ta yangi o‘rmon xo‘jaligi tashkil etilib, 123 million tup ko‘chat yetishtirilishi rejalashtirilgan.

Prezident sanoat va xizmat ko‘rsatish korxonalari hamda davlat obyektlarida quyosh panellarini o‘rnatishni rag‘batlantirish choralarini kuchaytirish bo‘yicha topshiriq berdi. Buning uchun 2 trillion so‘m kredit ajratiladi. Bundan tashqari, maktab, bog‘cha va shifoxonalarda issiqlik nasoslarini faol joriy etish boshlanadi.

Energiya iste’moli past va qo‘shilgan qiymati yuqori bo‘lgan tarmoqlarni rivojlantirish muhim vazifa bo‘lib qolmoqda. 400 ta yirik korxonada energiya auditi o‘tkazilib, joriy yilda yangi ishlab chiqarish loyihalarining 15 foizi ekologik toza bo‘ladi. 2030 yilga kelib bu ko‘rsatkich 55 foizga yetkaziladi.

Kam uglerodli tashabbuslarni qo‘llab-quvvatlash uchun xalqaro moliya tashkilotlaridan 300 million dollar jalb qilindi. Energetika obyektlarini qurishda mahalliy korxonalar 4 milliard dollarlik buyurtma oladi, bu esa yirik loyihalarda “yashil komponent” ulushini oshiradi.

Dastur doirasida fuqarolar ko‘chatlarni xarid qila oladigan “Yashil olam” onlayn platformasini yaratish ko‘zda tutilgan. Shuningdek, ekologik texnologiyalarni joriy etayotgan tadbirkorlarga “yashil tadbirkor” maqomi beriladi, bu ularga qo‘shimcha imtiyozlar va yangi bozorlarga chiqish imkonini beradi.