Shanxay hamkorlik tashkiloti bosh kotibi Nurlan Yermekbayev SHHT a’zo davlatlari rahbarlarining yig‘ilishi 2025-yil avgust oyining oxiri — sentyabr oyining boshida bo‘lib o‘tishini ma’lum qildi. Tadbir Xitoyda o‘tkazilishi rejalashtirilmoqda.

Kutilayotgan yig‘ilishda muhim qarorlar qabul qilinishi, shuningdek, muhim hujjatlar imzolanishi va tasdiqlanishi ko‘zda tutilgan. Yermekbayevning ta’kidlashicha, hozirda ushbu muhim voqeaga faol tayyorgarlik ishlari olib borilmoqda, biroq sammitning yakuniy shakli hali ishtirokchi davlatlar rahbarlari tomonidan tasdiqlanishi lozim.

Shanxay hamkorlik tashkiloti 2001-yilda ta’sis etilgan. Bugungi kunda uning a’zolari Qozog‘iston, Xitoy, Qirg‘iziston, Rossiya, Tojikiston, O‘zbekiston, Pokiston, Hindiston, Eron, 2024-yildan boshlab esa Belarus hisoblanadi. SHHT davlat rahbarlarining so‘nggi sammiti o‘tgan yilning iyul oyida Ostona shahrida o‘tkazilgan edi.