Ijtimoiy tarmoqlarda Shota Rustaveli ko‘chasidagi 22-uyning buzilishi mumkinligi haqida qizg‘in muhokamalar ketmoqda. Go‘yoki binoni fevral oyida buzishga tayyorlab, ataylab avariya holatiga keltirish ishlari olib borilayotgani haqida xabarlar paydo bo‘ldi. Ammo rasmiy tuzilmalar bu mish-mishlarni inkor etmoqda.

Madaniy meros agentligi tekshiruv o‘tkazib, mazkur uy Moddiy madaniy merosning ko‘chmas mulk obyektlari milliy reestriga kiritilmaganligini aniqladi. Hozirda uni reestrga kiritish bo‘yicha ishlar olib borilmoqda, yakuniy qaror esa Ilmiy-ekspert kengashi tomonidan qabul qilinadi.

Toshkent shahar hokimligi ham 22-uyni buzish bo‘yicha hech qanday rasmiy qaror yo‘qligini tasdiqladi. Tarixiy va madaniy qimmatga ega bo‘lgan obyektlarga oid barcha masalalar faqat puxta tahlil qilinib, tegishli idoralar bilan kelishilgandan so‘nggina hal etiladi.

Madaniy meros agentligi aholini tashvishga soladigan asossiz ma’lumotlarni tarqatmaslikka chaqirmoqda. Obyekt maqomidagi barcha o‘zgarishlar faqat rasmiy manbalar orqali ma’lum qilinadi.