Toshkent va Bern Gulnora Karimovaga qarshi jinoiy ish doirasida Shveysariyada musodara qilingan yana 182 million dollarni O‘zbekistonga qaytarish bo‘yicha kelishuvga erishdi. Tegishli bitim 6 fevral kuni O‘zbekiston adliya vaziri Akbar Toshqulov va Shveysariya elchisi Konstantin Obolenskiy tomonidan imzolandi.

Mablag‘lar Birlashgan Millatlar Tashkiloti huzuridagi “Uzbekistan Vision 2030” ko‘p tomonlama ishonch jamg‘armasi orqali qaytariladi. Ta’kidlanishicha, ushbu mablag‘ sog‘liqni saqlash va ta’lim sohalaridagi ijtimoiy loyihalarni moliyalashtirishga yo‘naltiriladi.

Eslatib o‘tamiz, O‘zbekistonning birinchi prezidenti qiziga nisbatan jinoiy ish Shveysariya Bosh prokuraturasi tomonidan 2012 yilda qo‘zg‘atilgan edi. O‘shandan beri mamlakat noqonuniy yo‘l bilan olingan mablag‘larni bir necha bor qaytargan.