O‘zbekistonning Surxondaryo viloyatida To‘polang suv ombori kaskadida joylashgan “Zarchob-2A” kichik gidroelektr stansiyasi faoliyatini boshladi. Loyiha quvvati 3 megavatt bo‘lgan ushbu stansiya yiliga 13,3 million kilovatt-soat ekologik toza elektr energiyasi ishlab chiqaradi.

Bu hajm viloyatdagi 6 ming xonadonni elektr energiyasi bilan ta’minlash uchun yetarli. Bundan tashqari, «Zarchob-2A‘ning ishga tushirilishi har yili to‘rt million kub metrgacha tabiiy gazni tejash imkonini beradi, bu esa atmosferaga chiqariladigan zararli moddalarni sezilarli darajada kamaytirishga xizmat qiladi.

Yangi GESning qurilishi 3,4 million AQSh dollariga tushdi. Bu kaskad infratuzilmasini rivojlantirishning davomi bo‘ldi: 2024-yil avgust oyida “Zarchob-1A” kichik GES ishga tushirilgan bo‘lsa, hozirda gidroagregat quvvati 16 megavatt bo‘lgan “Zarchob-3” stansiyasi qurilmoqda.

Viloyat hokimligi ma’lumotlariga ko‘ra, 2025 yil oxiriga qadar To‘polang kaskadidagi elektr stansiyalarining umumiy quvvati 300 megavattga yetadi. So‘nggi sakkiz yil ichida Surxondaryo viloyatida ekologik toza energiya ishlab chiqarish 20 barobar oshdi, bu esa O‘zbekistonning “yashil” energetikani rivojlantirish borasidagi sa’y-harakatlarini yaqqol ko‘rsatib turibdi.