Toshkent viloyatida atmosferaga chiqarilayotgan ifloslantiruvchi moddalar me’yoridan oshib ketishining sabablarini aniqlash va havo ifloslanishini kamaytirish choralarini ko‘rishga qaratilgan tadqiqot yakuniga yetkazildi. Davlat ekologiya nazorati inspeksiyasi, Ekologiya, atrof-muhitni muhofaza qilish va iqlim o‘zgarishi vazirligi, Toshkent shahar va viloyat ekologiya boshqarmalari hamda Milliy gvardiya va ichki ishlar organlari vakillaridan iborat ishchi guruh Zangiota, Qibray va Toshkent tumanlarida, shuningdek Toshkent shahrining bir nechta tumanlarida tahlillar o‘tkazdi.

Havoning ifloslanishini o‘rganish uchun ko‘chma laboratoriyadan foydalanildi. U Eshonguzar qishlog‘idan Toshkent pediatriya tibbiyot institutiga qadar bo‘lgan Toshkent halqa avtomobil yo‘li bo‘ylab 9 ta nuqtada o‘lchovlar amalga oshirdi. Aniqlangan ma’lumotlar PM-2.5 va PM-10 kabi ifloslantiruvchi moddalar darajasining sezilarli darajada oshganini ko‘rsatdi. Bu ko‘rsatkich har bir kub metr havoda 0,05 mg dan 540 mg gacha ko‘tarilgan.

Monitoring doirasida Toshkent viloyatidagi 486 ta issiqxonaning holati ham o‘rganildi. Tekshiruv davomida mavjud 440 ta issiqxonaning 46 tasi mavsumiy bo‘lib, qozonxona bilan jihozlanmagani aniqlandi. Turli tumanlarda joylashgan ushbu issiqxonalarda ekologik standartlarni ta’minlash uchun zarur vositalar mavjud emas.

Nazorat tadbirlari natijasida ekologik talablarni buzgan 37 ta issiqxona egasiga jarima solinib, 46 ta obyekt faoliyati to‘xtatildi. Qolgan, standartlarga javob bermaydigan issiqxona egalariga chang-gaz tozalash uskunalarini o‘rnatish va rezina kabi chiqindilardan yoqilg‘i sifatida foydalanishni to‘xtatish bo‘yicha ogohlantirishlar berildi.

Ekologik vaziyatni yaxshilash bo‘yicha chora-tadbirlar davom etmoqda.