Poytaxt hokimligi tashabbusi bilan 1-3 may kunlari O‘zbekiston Milliy kutubxonasi yonidagi maydonda navbatdagi Toshkent gullar bayrami bo‘lib o‘tadi. Bu yil festivalda nafaqat gul yetishtirish va landshaft dizayniga ixtisoslashgan kompaniyalar, balki ekologik dizayn, barqaror rivojlanish va yashil iqtisodiyot sohasida faoliyat yurituvchi tashkilotlar ham ishtirok etadi. Poytaxt hokimligi matbuot xizmati xabariga ko‘ra, festivalga tashrif buyuruvchilar turli xil gullar xarid qilish, ovqatlanish zonasiga tashrif buyurish, animatorlar va konsert tomoshalari bilan ko‘ngilochar dasturdan bahramand bo‘lish imkoniyatiga ega bo‘ladi.

– Festival ekologik ta’lim, tabiatni muhofaza qilish, yoshlar o‘rtasida ekologik madaniyatni shakllantirish va “yashil” iqtisodiyot tamoyillarini rivojlantirish masalalariga jamoatchilik e’tiborini jalb etishdan iborat”.— deyiladi hokimlik xabarida.

Festival munosabati bilan 29 apreldan 3 mayga qadar bir necha markaziy ko‘chalarda: Zarafshon ko‘chasi (Hyatt Regency Tashkent mehmonxonasi va Matbuotchilar ko‘chasi oralig‘i), Istiqlol ko‘chasi (Amir Temur va Buyuk Turon ko‘chalari oralig‘i) va Buyuk Turon ko‘chasi (Istiqlol ijod saroyi chorrahasidan boshlab) avtomobillar harakati vaqtincha cheklanadi.