O‘zbekiston poytaxtida jamoat transporti haydovchilari milliy bosh kiyimda ish boshladi. “Toshshahartransxizmat” AJ ma’lumotiga ko‘ra, 31 yanvar kuni 67-sonli (“Yunusobod, 19-mavze — Xalqaro aeroport”) va 91-sonli (“Yunusobod, 15-mavze — Ko‘kcha masjidi”) yo‘nalishlarda haydovchilar do‘ppi kiyib, ish navbatiga chiqdi.

Mazkur tashabbus Toshkent shahar hokimining milliy an’analarni targ‘ib qilish to‘g‘risidagi qarori doirasida amalga oshirilmoqda. 21 yanvarda imzolangan hujjatga muvofiq, davlat korxonalari, muassasalari va tashkilotlari xodimlari juma kunlari milliy kiyim unsurlarini kiyishlari lozim. Ta’kidlanishicha, shu yo‘l bilan rahbariyat shaharning madaniy o‘ziga xosligini ta’kidlashga va uni nafaqat mahalliy aholiga, balki poytaxt mehmonlariga ham namoyish etishga intilmoqda.