O‘zbekiston poytaxtida O‘zbekiston Respublikasi Oliy ta’lim, fan va innovatsiyalar vazirligi hamda Innovatsion rivojlanish agentligi hamkorligida MDH Ijroiya qo‘mitasi ko‘magida tashkil etilgan MDH mamlakatlari tarixida ilk bor Innovatsion rivojlanish forumi bo‘lib o‘tdi.

Forumda MDH Bosh kotibi o‘rinbosari Denis Trefilov boshchiligidagi MDH Ijroiya qo‘mitasi delegatsiyasi ishtirok etdi., tadbirni yuqori saviyada tashkil etgani uchun O‘zbekiston tomoniga minnatdorlik bildirdi. U mazkur forumning Ilmiy-texnikaviy va innovatsion sohalarda hamkorlik bo‘yicha Davlatlararo kengashi yig‘ilishi bilan birgalikda o‘tkazilishi birgalikda amaliy yechimlar ishlab chiqish uchun o‘ziga xos platforma yaratishini alohida ta’kidladi.

Trefilov global texnologik muammolar sharoitida MDH davlatlarining ilmiy-texnikaviy suverenitetini ta’minlash zarurligiga e’tibor qaratib, ushbu sohalardagi hamkorlikning strategik ahamiyatini qayd etdi. Shuningdek, u Hamdoʻstlik doirasida ilmiy-texnikaviy va innovatsion sohalarda hamkorlikni rivojlantirish uchun qulay shart-sharoitlar va salmoqli salohiyat mavjudligini taʼkidladi.

MDH Bosh kotibi oʻrinbosari forumning muntazam oʻtkazilishi doimiy muloqotni qoʻllab-quvvatlash imkonini berishi, shuningdek, qoʻshma loyiha va tashabbuslarni amalga oshirish uchun mustahkam zamin yaratishiga umid bildirdi.

MDH innovatsion rivojlanish forumining asosiy maqsadi mintaqada texnologik yutuqlar, iqtisodiy o‘sish va transchegaraviy sheriklikni mustahkamlash uchun hamkorlik muhitini yaratishga ko‘maklashishdan iborat.

Tadbir MDH mamlakatlarida ilmiy-texnik va innovatsion tashabbuslarni qo‘llab-quvvatlash, qo‘shma loyihalarni amalga oshirish uchun samarali platforma yaratish, ilmiy tashkilotlar o‘rtasidagi hamkorlikni mustahkamlash hamda texnologiyalar transferi va tijoratlashtirish sohasida davlat-xususiy sheriklikni rag‘batlantirishga qaratilgan.

Forum ishtirokchilari zamonaviy texnologiyalarni rivojlantirishning dolzarb masalalari hamda istiqbolli innovatsion loyihalarni ilgari surish va tijoratlashtirish bo‘yicha MDHga a’zo davlatlarning Innovatsion hamkorlik Davlatlararo dasturining istiqbollarini muhokama qildilar.