Toshkentda Turkiyaning birinchi prezidenti Mustafo Kamol Otaturk nomidagi ko‘cha paydo bo‘lishi mumkin. Bu masala poytaxt hokimi Shavkat Umurzoqov bilan Turkiyaning O‘zbekistondagi elchisi Olgan Bekar o‘rtasidagi uchrashuvda muhokama etildi.

Shavkat Umurzoqov O‘zbekiston-Turkiya munosabatlarining jadal rivojlanib borayotganini ta’kidlab, buni ikki davlat rahbarlari tomonidan asos solingan strategik sheriklikning natijasi deb baholadi. Shuningdek, u Turkiya diplomatik korpusiga ikki tomonlama hamkorlikni mustahkamlashdagi hissasi uchun minnatdorchilik bildirdi.

O‘zbekistondagi diplomatik vazifasini yakunlayotgan elchi Olgan Bekar samimiy qabul uchun tashakkur aytdi. U hamkorlik istiqbollari haqidagi fikrlari bilan o‘rtoqlashib, Toshkent ko‘chalaridan biriga Otaturk nomini berishni taklif etdi. Shuningdek, turk maktabini kengaytirish va poytaxtda turk bog‘ini barpo etish masalalari ham ko‘rib chiqildi.

Ilgari Toshkent markazida Otaturk ko‘chasi bo‘lgan, biroq 2011-yilda u Zarafshon ko‘chasi deb o‘zgartirilgan edi.