Turkiston, 2025-yil, 16-may – Karavan info axborot agentligi.Qozog‘iston Respublikasi Davlat maslahatchisi Erlan Karin Turkiston shahrida bo‘lib o‘tayotgan “Yassaviy merosi davrlar va madaniyatlar muloqotida: gumanistik yo‘nalishlar va zamonaviy muammolar” mavzusidagi xalqaro simpoziumning ochilishida ishtirok etdi.

Erlan Karin Prezident Qosim-Jomart Tokayevning simpozium ishtirokchilariga yo‘llagan tabrik maktubini o‘qib eshittirdi. Davlat maslahatchisi o‘z nutqida mazkur forum Yassaviyning insonparvarlik g‘oyalarini tizimli o‘rganishga, uning ma’naviy-intellektual merosini jahon miqyosida targ‘ib qilishga salmoqli hissa qo‘shayotganini ta’kidladi.

Ikki kun davom etadigan anjumanda Qozog‘iston, Ozarbayjon, Germaniya, Hindiston, Eron, Italiya, Qirg‘iziston, Rossiya, AQSh, Tojikiston, Turkmaniston, Turkiya, O‘zbekiston va Yaponiyadan 100 ga yaqin yetakchi olimlar ishtirok etmoqda. Simpozium dasturida Yassaviy merosining turli jabhalarini qamrab oluvchi uchta tematik bo‘lim doirasidagi ilmiy maqolalar, qizg‘in muhokamalar va tajriba almashish mavjud.

Surat:Oqorda matbuot xizmati