IC Holding tarkibidagi Turkiyaning IC İçtaş İnşaat kompaniyasi Samarqand va Buxoro orasidagi pullik avtomobil yo‘li qurilishida qatnashadi. O‘zbekiston Iqtisodiyot va moliya vazirligi ma’lum qilishicha, Avtomobil yo‘llari davlat qo‘mitasi bilan o‘zaro anglashuv memorandumi imzolangan.
2030 yilgacha bo‘lgan davlat-xususiy sheriklik dasturiga kiritilgan loyihaning qiymati 1 milliard dollar deb baholanmoqda. Tezkor magistral Samarqand, Navoiy va Buxoro viloyatlari hududlaridan o‘tadi.
IC İçtaş İnşaat O‘zbekistonning yo‘l va ko‘priklarni qayta qurish bilan bog‘liq boshqa loyihalariga ham qiziqish bildirdi. Infratuzilma sohasida 55 yildan ortiq faoliyat yuritib kelayotgan kompaniya yirik inshootlar, xususan, Istanbuldagi 150 kilometrlik avtomagistral va Bosfor ustidagi ko‘prik qurilishi bilan tanilgan.