UzAuto Motors Powertrain kompaniyasining vazifani bajaruvchi bosh direktori etib Saidazim G‘ulomov tayinlandi. Korporativ axborot yagona portalida xabar berilishicha, bu qaror kompaniya aksiyadorlari tomonidan 26-dekabr kuni o‘tkazilgan yig‘ilishda qabul qilingan.

G‘ulomov 2025-yil 30-iyungacha, ya’ni yangi rahbar tayinlangunga qadar ushbu lavozimda ishlaydi. Vazifalarni bajarish davrida u bosh direktorning barcha huquq va vakolatlariga ega bo‘ladi.

Ilgari UzAuto Motors va UzAuto Motors Powertrain kompaniyalarining bosh direktori Bu Andersson edi. U uch yil va to‘rt oylik faoliyatdan so‘ng 27-dekabr kuni o‘z lavozimini tark etdi. Kompaniya e’lonida uning ketishi “tomonlarning o‘zaro kelishuviga ko‘ra” yuz bergani ta’kidlangan.

Saidazim G‘ulomov kompaniyada boy tajribaga ega. U 2016-yildan Andersson kelguniga qadar UzAuto Motors Powertrain’ni boshqargan va umuman olganda, 2010-yil aprelidan buyon shu yerda ishlaydi. Bundan oldin G‘ulomov GM O‘zbekiston va AQShdagi Regions Bank’da faoliyat yuritgan.