Xitoyning Tyanszin shahrida “Shanxay ruhini targ‘ib qilish: ShHT harakatda” shiori ostida Shanxay hamkorlik tashkilotining (SHHT) 25-sammiti boshlandi. Yigʻilishda 20 dan ortiq davlat, jumladan, ShHTga aʼzo barcha 10 davlat: Xitoy, Hindiston, Rossiya, Pokiston, Eron, Qozogʻiston, Qirgʻiziston, Tojikiston, Oʻzbekiston va Belarus rahbarlari ishtirok etmoqda.

Sammitning ochilishida XXR raisi Si Szinpin tabrik nutqi bilan chiqdi. Bungacha davlatlar rahbarlari Tyantszinda birgalikda suratga tushishgan.

Uchrashuvda Tyantszin deklaratsiyasi imzolanishi, ShHTning 10 yillik rivojlanish strategiyasi hamda xavfsizlik, savdo, energetika va madaniy hamkorlik bo‘yicha yakuniy hujjatlar tasdiqlanishi kutilmoqda. Shuningdek, Ikkinchi jahon urushi tugaganligi va BMT tashkil topganining 80 yilligiga bag‘ishlangan bayonotlar qabul qilinadi.

ShHT Xitoy, Rossiya, Qozog‘iston, Qirg‘iziston va Tojikistonni o‘z ichiga olgan “Shanxay beshligi” negizida tuzilgan bo‘lib, keyinchalik unga O‘zbekiston ham qo‘shilgan. Bugungi kunda tashkilot 10 ta aʼzo davlatni, 2 ta kuzatuvchi va Osiyo, Yevropa va Afrikadan 14 ta muloqot boʻyicha hamkorlarni birlashtirgan.

ShHT dunyo hududining qariyb 24 foizini va dunyo aholisining 42 foizini qamrab oladi, aʼzo davlatlar dunyo yalpi ichki mahsulotining toʻrtdan bir qismini tashkil qiladi. Yigirma yil ichida savdo hajmi qariyb 100 barobar o'sdi. 2024-yilda Xitoyning ShHT aʼzolari, kuzatuvchilari va muloqot boʻyicha hamkorlari bilan savdosi rekord darajadagi 890 milliard dollarga yetdi, bu mamlakat umumiy tashqi savdo aylanmasining 14,4 foizini tashkil etdi.

ShHTga a’zo davlatlar rahbarlarining avvalgi sammiti 2024-yil iyul oyida Qozog‘istonda bo‘lib o‘tgan va unda energetika, xavfsizlik, moliya va axborot xavfsizligi bo‘yicha 25 ta strategik hujjat qabul qilingan edi.