Xitoyning Jingbian Xinrong Oil Well Technical Service Co., Ltd kompaniyasi “O‘zbekneftgaz” bilan hamkorlikda Ustyurt platosida uglevodorodlar qazib olish hajmini oshirish ustida ishlaydi. “O‘zbekneftgaz” raisi Bahodir Siddiqov va Xitoy kompaniyasi bosh direktori Yunki Shang o‘rtasidagi muzokaralar qiyin qazib olinadigan zaxirali konlarni o‘zlashtirish bo‘yicha qo‘shma tashabbuslarni muhokama qilish bilan yakunlandi.

Loyihalarni Uz Gas Projects sho‘ba korxonasi bilan hamkorlikda risk-servis shartlari asosida amalga oshirish rejalashtirilmoqda. Ishlab chiqarish jarayonlari samaradorligini oshirish uchun ilg‘or texnologiyalar va innovatsion yechimlarni joriy etishga hamda tajriba almashishga alohida e’tibor qaratildi.

Shuningdek, “O‘zbekneftgaz” Fransiyaning XP Group kompaniyasi bilan ham muzokaralar o‘tkazdi. Past rentabelli konlarda gaz qazib olish hajmini ko‘paytirishga qaratilgan loyiha muhokama qilindi. Tomonlar hamkorlikni chuqurlashtirish, zamonaviy texnologiyalarni joriy etish va uglevodorodlarni qazib olish hamda qayta ishlash jarayonlarini takomillashtirish niyatlarini tasdiqladi.

Belgilangan rejalar doirasida “O‘zbekneftgaz” 2025-yilda geologiya-qidiruv va ishlab chiqarish loyihalariga 2 milliard dollar miqdorida xalqaro investitsiyalarni jalb qilishni maqsad qilgan. Seysmik qidiruv maydonini 6,5 ming kvadrat kilometrgacha kengaytirish va 15 ta istiqbolli uchastkada geologiya-qidiruv ishlarini olib borish rejalashtirilgan. Bu chora-tadbirlar zaxiralarning tugashi muammosini hal qilishi kutilmoqda.