Yaponiya xalqaro hamkorlik agentligi (JICA) ixtisoslashtirilgan nevrologiya va insult ilmiy-amaliy tibbiyot markazini qurish va jihozlash uchun 150 million dollar miqdorida kredit ajratadi.

Investitsiyalar, sanoat va savdo vaziri Laziz Qudratovning JICA prezidenti bilan uchrashuvida energetika, sog‘liqni saqlash, inson kapitalini rivojlantirish va O‘zbekiston hududlarida yangi erkin iqtisodiy zonalarni tashkil etish bo‘yicha qo‘shimcha loyihalar muhokama qilindi.

2024-yilda imzolangan dastur ijrosiga alohida e’tibor qaratildi. U 2,4 milliard dollarlik 20 ta yirik loyihani o‘z ichiga oladi.

Muzokaralar doirasida Yaponiya hukumati bilan “almashinuv notalari” hamda tibbiyot markazi qurilishi uchun kredit bitimini imzolash marosimi bo‘lib o‘tdi. Bundan tashqari, JICA va Investitsiyalar, sanoat va savdo vazirligi o‘rtasida chorvachilik, energetika, ta’lim va boshqa yo‘nalishlarda qo‘shma loyihalarni qamrab oluvchi hamkorlik to‘g‘risida bayonnoma imzolandi.