Zomin davlat qo‘riqxonasining fotoqopqoniga noyob Tyanshan qo‘ng‘ir ayig‘i tushib qoldi. Ushbu tur IUCN Qizil ro‘yxati va O‘zbekiston Qizil kitobiga zaif tur sifatida kiritilgan bo‘lib, uning tabiatdagi soni xavf ostida qolmoqda.

Bu kenja turga mansub ayiqlar G‘arbiy Tyan-Shan va Pomir-Oloyda, shuningdek, O‘zbekistonning bir necha viloyatlarida yashaydi. 1970-1980-yillarda G‘arbiy Tyan-Shanda atigi 200-220 ta ayiq mavjud edi, biroq muhofaza choralari tufayli so‘nggi o‘n yilliklarda ayiqlar soni barqarorlashib, butun mamlakat bo‘ylab 500 dan oshdi. Bu yilgi kuzgi hisobga ko‘ra, Zomin davlat qo‘riqxonasi hududida 24 ta ayiq yashayotgani aniqlandi.

1928-yilda tashkil etilgan Zomin qo‘riqxonasi Jizzax viloyatining Zomin va Baxmal tumanlari hududida joylashgan. Qo‘riqxonada 149 turdagi hayvonlar mavjud bo‘lib, ulardan 17 tasi O‘zbekiston Qizil kitobiga kiritilgan.