Өткөн жумада “Казань Экспо” Эл аралык көргөзмө борборунун аянтчасында “Россия-Ислам дүйнөсү: Казань форуму 2024” Эл аралык экономикалык форумунун алкагында Кыргызстанда инвестициялык долбоорду ишке ашыруу боюнча өз ара түшүнүшүү жана кызматташтык жөнүндө меморандум түзүлдү. Кыргызстандын Экономика жана коммерциялык министрлиги, Кыргыз Республикасынын Президентинин Чүй облусундагы ыйгарым укуктуу өкүлүнүн аппараты жана «Wildberries» ЖЧКсынын ортосунда кол коюлган.

Документке ылайык, Кыргызстандын Чүй облусунда 300 миң чарчы метр чек арадагы электрондук сооданы тейлөө үчүн логистикалык борбордун курулушу күтүлүүдө.

Кыргыз Республикасында Бишкек жана Ош шаарларында 2 Wildberries сорттоочу борборлор иштеп жатат, ошондой эле 130дан ашык заказдарды кабыл алуу пункттары бар. Азыркы учурда, маркетплейсте 17 миңден ашуун кыргызстандык сатуучу катталса, 2022-жылы алардын саны 7 миңге эле жакын болгон.

Бул долбоорду ишке ашыруу Кыргызстандын ИДПсынын динамикасына оң таасирин тийгизет деп күтүлүүдө, анткени ал жаңы чакан жана орто ишканалардын, подрядчылардын жана сатып алуучулардын өнүгүшү жана пайда болушу аркылуу, калктын иш менен камсыз болуу деңгээлин жана экономикалык жактан активдуу калктын санын жогорулатууга  көмөктөшөт.

Бул келишим Орусия менен Кыргызстандын ортосундагы соода-экономикалык кызматташтыктын маанилүү учуру болот.