МОСКВА, 2 сентябри соли 2025 АИ «Караван Инфо».  Москва ва Пекин зиёда аз бист санади ҳамкорӣ дар соҳаи энергетика, аэрокосмос ва зеҳни сунъиро имзо намуданд. Дар ин бора телевизиони Марказии Чин хабар медиҳад.

Созишномаҳои дуҷониба инчунин кишоварзӣ, назорати санҷишӣ ва карантинӣ, тандурустӣ, илм, маориф ва ВАО-ро дар бар мегиранд.

Дар ҷаласаи сатҳи олӣ рӯзи сешанбе дар Хонаи маҷлисҳои халқӣ Президенти Русия Владимир Путин қайд намуд, ки эътимод, кӯмаки мутақобила ва устуворӣ дар ҳимояи манфиатҳои умумӣ асоси шарикии ҳамаҷониба ва ҳамкории стратегии байни ду кишвар дар давраи нав гардид.

Си Ҷинпин таъкид намуд, ки муносибатҳои чин ва русия ба озмоиши замон тоб оварда, намунаи ҳамсоягии нек, дӯстӣ ва ҳамкории стратегӣ гардиданд.

Коршиносон қайд мекунанд, ки созишномаҳои нав робитаҳои иқтисодӣ ва технологии ду давлатро тақвият дода, барои ҳамкории дарозмуддат дар бахшҳои асосӣ платформа фароҳам меоранд.

Муносибатҳои Русия ва Чин дар доираи шарикии ҳамаҷонибаи стратегӣ, ки иқтисодиет, энергетика, мудофиа ва илмро фаро мегирад, рушд мекунанд.

Дар солҳои охир, кишварҳо мунтазам созишномаҳои дуҷонибаро имзо мекунанд, ки ба лоиҳаҳои муштараки инфрасохторӣ, таҳқиқоти инноватсионӣ ва таҳкими ҳамкориҳои технологӣ нигаронида шудаанд.

Ин формати ҳамкорӣ ба ҳарду ҷониб имкон медиҳад, ки вобастагии худро аз омилҳои беруна коҳиш диҳанд ва мавқеи худро дар арсаи байналмилалӣ мустаҳкам кунанд.

Аксҳо: хадамоти Матбуоти раиси ҶХХ