МОСКВА, 2 сентябри соли 2025 АИ «Караван Инфо».  Белгия ният дорад, ки Фаластинро ҳамчун давлати мустақил дар ҷаласаи Ояндаи Ассамблеяи Генералии СММ дар моҳи сентябр расман эътироф кунад. Дар ин бора Вазири корҳои хориҷии кишвар Максим Прево дар муроҷиати расмии худ изҳор дошт.

Раиси идораи сиёсати хориҷӣ ин иқдомро “амали муҳими сиёсӣ ва дипломатӣ” номид, ки ба пешбурди принсипи ҳамзистии ду давлат равона шудааст.

Ҳамзамон, Белгия омода аст, ки бо мақсади таъмини риояи ҳуқуқи байналмилалӣ алайҳи Исроил чораҳои таҳримӣ ҷорӣ кунад.

Дар баробари ин, вазир таъкид намуд, ки эътирофи ниҳоии ҳуқуқӣ танҳо пас аз иҷрои ду шарти асосӣ: озод намудани ҳамаи гаравгонҳои исроилӣ ва қатъи назорати ҳаракати ҲАМОС дар қаламравҳои фаластин ба амал меояд.

Прево инчунин қайд намуд, ки Белгия ҳама гуна зуҳуроти зиддисемитизм ва сафедкунии терроризмро қатъиян маҳкум мекунад.

Масъалаи эътирофи давлати Фаластин яке аз баҳсбарангезтарин дар сиёсати байналмилалӣ боқӣ мемонад. То имрӯз беш аз 130 аз 193 давлати узви СММ Фаластинро ҳамчун давлати мустақил эътироф намудаанд.

Дар байни кишварҳои ИА ин иқдомро қаблан Шветсия, Кипр, Малта ва инчунин аксари давлатҳои аврупои шарқӣ анҷом дода буданд.

Қарори Белгия фишори афзояндаи Кишварҳои аврупоиро ба Исроил дар робита ба муноқишаи идомаёфта дар Ғазза ва тавсеаи шаҳракҳои исроилӣ дар соҳили Ғарбии Дарёи Урдун инъикос мекунад.

Аксҳо аз манбаъҳои кушода