Душанбе, 25 сентябр, – АИ «Корвон Иттилоот». 23 сентябри соли 2025 дар шаҳри Ню-Йорк Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо Директори иҷроияи Бонки Ҷаҳонӣ хонум Анна Бйерде мулоқот анҷом дод.

Эмомалӣ Раҳмон Бонки Ҷаҳониро яке аз шарикони асосии Тоҷикистон дар самти рушд номида, ба роҳбарияти он барои ҳамкории судманд ва дарозмуддат изҳори сипос намуд. Ба гуфтаи Президент, саҳми Бонк дар татбиқи лоиҳаҳои стратегии кишвар нақши муҳим дар таҳкими иқтисод ва иҷтимоиёт дорад.

Дар мулоқот таваҷҷуҳи махсус ба рушди ҳамкорӣ дар соҳаи гидроэнергетика ва маблағгузории лоиҳаҳои марбут ба он зоҳир шуд. Ин соҳа барои истиқлолияти энергетикӣ ва рушди «сабз»-и Тоҷикистон аҳамияти калидӣ дорад.

Ҳамзамон, густариши ҳамкориҳо дар бахшҳои саноат, кишоварзӣ, инфрасохтор ва коммуникатсия, рақамикунонӣ, маориф ва дастгирии бахши хусусӣ баррасӣ гардид. Таъкид шуд, ки таъсиси ҷойҳои нави корӣ ва баланд бардоштани сатҳи зиндагии аҳолӣ яке аз ҳадафҳои асосӣ мебошад.

Дар ҷараёни гуфтугӯҳо тарафҳо ҷараёни татбиқи Лоиҳаи дастгирии сиёсати рушдро баррасӣ намуда, ҳамзамон омодагии худро барои таҳияи Стратегияи нави ҳамкорӣ миёни Тоҷикистон ва Бонки Ҷаҳонӣ дар панҷ соли оянда иброз доштанд.

Мавзӯъҳои дигар паёмадҳои тағйирёбии иқлим ва масъалаҳои амният дар минтақа ва ҷаҳон буданд, ки ба иҷрои барномаҳои рушд таъсири манфӣ мерасонанд.

Мулоқот дар фазои созандаву самарабахш баргузор гардид. Ҷонибҳо омодагии худро барои таҳкими ҳамкории дарозмуддат ба хотири рушди устувор ва шукуфоии Тоҷикистон таъкид карданд.

АКС: Хадамоти матбуоти Президенти Ҷумҳурии Тоҷикистон